السادة أعضاء قسم الخارجى .. برجاء الجلوس فى أماكنكم وربط أحزمة الأمان

لا يساورنى أدنى شك فى أننا جميعا على وشك
الانتهاء من الخطوط العريضة لمستقبلنا والبدء فى خوض التفاصيل التى أعتبرها أكثر
ارهاقا وتحتاج الى المزيد من الحرية فى الحركة كى نتمكن من التوصل الى أصغر وأدق
الملامح التى نريد جميعا أن نميز بها أنفسنا عن غيرنا .. هذه هى الحياة دائما .. ما
ان تنتهى من الخط العريض والفكرة العامة، حتى تبدأ خوض المعركة بكافة
تفاصيلها

واضح اوى انى بقول كلام كبير .. بس مفهوم

على كل حال مش مهم كل اللى قرأتوه ده ...
تعالوا نتكلم شوية عن زملائى فى الدستور .. المرة دى أصدقائى فى قسم الشئون
الخارجية... وربنا يستر

هنتكلم بشكل عشوائى طبعا عشان محدش يقول لى
فلان اهم منى .. ونبدأ بأحدث الوجوه وأصغرها فى القسم

اسراء محمد على

اسراء هى أحدث من انضم الى قسمنا .. والطبيعى جدا انها من العقول الشريفة ولذلك انضمت على الفور الى القائمة السوداء ... أعداء الرخامة وقلة الذوق .. دائما تجدها مستعدة للمشاركة فى أى عمل جماعى حتى لو كان مظاهرة للدفاع عن حقوق قطة فى الشارع المجاور للجريدة .. مرتبها صغير لكن الحمد لله بيكفيها تفطر يومين وهى مش محتاجة أكتر من كده .. ورغم ان التمانية وعشرين يوم اللى ف أخر الشهر بيكونوا مزنقين معاها انما هى عمرها ما بتشكى ولا بتحاول انها تخلى حد يشيل همها بدالها.

اسراء بالنسبة لى انا مستودع أسرار .. شايلة سر واحد بس .. لكن هو بصراحة سر مهم .. والمشكلة انها عندها قوة ملاحظة وبتتابع تطورات الموقف من مكتبها الكائن فى شمال شرق القسم .. سوسة .. بس طيبة

ومش بتكره أى حد غير الأستاذ فهام ابو خطوة

تعالى يا رضوان .. قصدى يا عبد السلام

محمد عبد السلام رضوان .. زميلنا الطيب والرائع والمجنون فى الوقت نفسه.. أكثرنا عصبية وتمردا على أصغر المواقف .. ولذلك دائما ما تسمع صوته عاليا وثائرا ومن السهل أن تدرك أنه منفعل من نظرة واحدة الى حركة شفتيه حتى وان لم يصدر أدنى صوت ولكنه لا يستطيع أن يكبت صوته كثيرا فمجرد أن تتاح له الفرصة تجد انفجارا كلاميا لا يوقفه الا دخول أحد المسئولين فى الجريدة .. جبان مش كدة!! لكن هو فى كل الأحوال انسان تحب تتكلم معاه ولما تعرفه من قريب تتمنى انك تكون صاحبه وصراحته هتفيدك كتير جدا جدا جدا

ويشترك عبد السلام مع اسراء فى كره الأخ فهام أبو خطوة

داليا الهمشرى ... وبس

داليا هى العضو التانى فى القائمة السوداء .. بعدى أنا مش بعد اسراء .. وهى آية فى الطيبة والرزانة ولكن هناك من يعتبرها تنكة ومتكبرة ولا أعرف من أين استقى هذا الوصف لها، ولكنه على أى حال غير مستغرب، لأن منظرها فى بعض الأحيان قد يوحى بذلك، كما قد توحى به بعض تعاملاتها مع من لا تستسيغ تصرفاتهم نحوها.. داليا من أكثر المتضررين معنويا فى القسم من الأستاذ فهام أبو خطوة نظرا للمراقبة الشديدة التى تفرض عليها.

ونسيت أقول انى كنت هوديها فى داهية لكن ربنا ستر وما وقعتش فى المقلب اللى كنت هاخليها تشربه من غير ما تحس

وكمان هى جدعة لما ضحت بنفسها ودخلت تمضى لى الاجازة وهى عارفة ايه اللى ممكن يحصل لها .. نردها لك فى الأفراح يا داليا

مش باقى غير الواد عطية

محمد عطية ... مراسلكم من الأراضى الاسرائيلية المحررة

محمد عطية .. مندوب اسرائيل فى الجريدة .. وأفضل واحد بيترجم عبرى فى الفترة الأخيرة فى الصحف المصرية .. لكن مشكلته ان اليهود بهتوا عليه، وأصبح يتعامل بنفس أسلوبهم معانا.. غامض جدا .. وغاوى يثير الشكوك حواليه.. لكنه فى الوقت نفسه طيب وكويس بس خاف من انتقامه، لانه – وبتصريح شخصى منه- قال انه بيحب ينتقم.

محمد شكاك جدا .. ودايما عنده عقدة الذنب لدرجة انه ممكن يهزر معاك ويضحكك ويرجع يعتذر لك .. انا اديته شوية نصايح .. ياريت يمشى عليها وهيبقى زى الفل ان شاء الله

مش باقى غير انى أقول ان محمد هوا اللى جاب لنا فهام أبو خطوة

الله يسامحك يا عطية